Datu pertsonalak (109-2014)

Aitortzen duen zergadunaren datuak

OHARRA: markatu dagokion laukia berdez dauden identifikazio eta harreman datuak Gipuzkoako Foru Aldundiko beste departamentuei lagatzea baimentzeko edo baimena kentzeko. (Banakako aitorpena aurkezten bada, datuak lagatzeko baimena emanda, interesatuaren datuak lagako dira, ez ezkontidearenak. Baterako aitorpena aurkezten bada, datuak lagatzeko baimena emanda, aitortzailearen eta ezkontidearen datuak lagako dira.)

Aitorpen bat "Artxibo" menuko "Aitorpen berria" komandoarekin sortu eta gero, aitortzen duen zergadunaren datu pertsonalak adierazi behar dira. Kalkulatzen diren kenkarien zati bat hemen zehazten denez, eremu hauek ongi betetzea komeni da.

Jarri lehendabizi IFZ, deiturak eta izena, eta harremanetarako daturen bat, telefonoa edo posta elektronikoa, esate baterako. Ondoren egoera zibila adierazi behar da: ezkongabea, ezkondua, alarguna, epai bidez banandua edo izatezko bikote-laguna, maiatzaren 7ko 2/2003 Legearen arabera eratua. Senar emazteen kasuan edo maiatzaren 7ko 2/2003 Legearen arabera eratutako izatezko bikotea osatu bada, adierazi zein den ezkontzako erregimen ekonomikoa edo izatezko bikotearen ondare erregimen ekonomikoa: irabazpidezkoa, ondasun banaketa edo bestelakoak.

Jaioteguna eta, hala bada, heriotza-eguna honela beteko dira: urtea/hilabetea/eguna (lauki bakoitzean bi digitu jarriz).Zergaduna pertsona desgaitua denean, "Desgaitasun %" laukian desgaitasun maila adieraziko da. Gainera, desgaitasun maila %75etik gorakoa bada, "Puntuak 3.en laguntzagatik" laukian hirugarrenengandik jaso beharreko laguntza zehazteko lortu den puntuazioa jarriko da.

Zergaduna mendeko pertsona denean, honako hau adieraziko da "Mendetasun maila" laukian:

T, Mendetasun txikia
E, Mendetasun ertaina
H, Mendetasun handia

"ERRETIRATUA EDO BALIOKIDEA" LAUKIA:

1. BGAE eta PPei egindako ekarpenak eta kontribuzioak zerga oinarritik ezin murriztu ahal izateko, erretiro egoera gertatutzat joko da bazkideak, partaideak, mutualistak edo aseguratuak dagokion Gizarte Segurantzaren araubidean edo araubide horren ordezkoak diren entitateetan erretiroa hartu duenean. Ondorio horietarako, erretiro aurreratua, erretiro malgua, partziala eta, bere kasuan, onartzen diren beste formula baliokideak, erretirotzat hartuko dira.

Hala ere, baldin eta bazkide, partaide, mutualista edo aseguratuak erretiro partzialari heltzen badio, zilegi izango da erretiro osorako egindako ekarpenak eta kontribuzioak zerga oinarritik murriztea.

2. Aurreko apartatuan aipatutako erretiroari heltzerik ez dagoenean, erretiroaren kontingentzia gertatuko da gizarte aurreikuspeneko planaren estatutuetan ezarritako adinean, zeina ezin baita izan 60 urtetik beherakoa; eta estatutuetan erretiratzeko adinik zehaztu ez bada, orduan Gizarte Segurantzaren araubide orokorrean ezarritako adinera iristean gertatuko da erretiroa.

3. Gizarte Segurantzaren araubide orokorrean erretiratzeko ezarritako adinetik aurrera ezindurik dauden zergadunak erretiratutzat joko dira artikulu honetan ezarritakoaren ondorioetarako.

Zertarako erabili kuota osoaren %0,7

Atal honetan hiru aukera eskaintzen dira: kuota osoaren %0,7 sektore publikoak kudeatzen dituen helburu orokorretarako ematea, Eliza Katolikoari laguntzeko ematea edo kopuru hori interes sozialeko beste helburu batzuetarako erabiltzea.Adierazi zein aukera egiten duzun.

Ezkontide edo 2/2003 Legearen arabera eratutako izatezko bikote-lagunaren datuak:

Adierazi bere IFZ, deiturak eta izena, jaioteguna eta, hala bada, heriotza-eguna. Ezkontideak edo bikote lagunak pentsioak edo hartzeko pasiboak jasotzen baditu edo desgaitua zein mendekoa bada, "Gakoa", "Desgaitasun %", "Puntuak 3.en laguntzagatik" eta "Mendetasun maila" laukiak zergadunaren apartatuan esandako eran beteko dira.

Familia ugaria

"x" ipiniko da familia ugaria den momentuan.

Ohiko etxebizitza

Zure ohiko etxebizitza errentan hartua bada, sakatu "Ohiko etxebizitza" botoia. Lehendabizi errentan hartua aukeratu behar duzu eta, gero, ordaindutako alokairuaren zenbatekoa eta errentatzailearen identifikazio datuak idatzi.

Beste pertsona batzuk

Sakatu hau bestelakoak badira "familia unitatean sartzen diren pertsonak" eta sartu euren datuak. Familia unitatekoak izan gabe, kenkarirako eskubidea sortzen duten beste pertsonak egonez gero, sakatu orduan ere aukera hau eta sartu haien datuak.

Adingabeko seme-alabak:

Jarri IFZ, deiturak eta izena, ekitaldian lortutako errenten zenbatekoa, jaioteguna eta, hala bada, heriotza-eguna.

Behar denean, gako hauetako bat jarriko da honako egoeren arabera:

C	Seme-alaben kenkaria zati berdinetan hainbanatzen denean bi gurasoen artean ezkontza baliogabetzeagatik, senar-emazteak dibortziatu edo banandu badira, edota izatezko bikotea maiatzaren 7ko 2/2003 Legearen arabera osatu ez bada.
H	Adingabeko seme-alabak ezkontideetako batenak bakarrik direnean (aurreko harremanen ondorioz) eta seme-alaben kenkarirako eskubidea ematen dutenean.
P	Guraso-aginte luzatu edo birgaitupean dauden seme-alaba adindunak direnean.