Aitorpenaren laburpena (20R)

2/2014 Foru Arauan ezarritakoaren arabera Gipuzkoako araudia aplikatu behar duten entitate eskuratzaileetako bakoitzak aurkeztu behar du 20R eredua, egindako eragiketa bakoitzagatik. Hortaz, eskritura publikoan hainbat eragiketa jasotzen badira eta haietan eskuratzailea bat eta bakarra bada, eskuratzaile horrek komunikazio bat aurkeztu behar du eragiketa mota bakoitzeko. Orobat, hainbat eskuratzaile daudenean, bakoitzak komunikazio bat egin behar du eragiketa bakoitzeko.

Ondorengo koadroan adierazten da, ematen den eragiketa mota bakoitzean, nor den entitate eskuratzailea, eskualdatzailea, eta zein kasutan egon daitekeen eskuratutako entitatea:

ERAGIKETA MOTA	ESKURATZAILEA	ESKUALDATZAILEA	ESKURATUTAKOA
Irenspen bidezko bat-egitea	Bereganatzailea	Bereganatua	Ez dago
Entitate berria eratzeko bat-egitea	Bereganatzailea	Bereganatuak	Ez dago
Bat-egite inpropioa	Bereganatzailea	Bereganatua	Ez dago
Erabateko zatiketa	Onuradunak	Zatikatutakoa	Ez dago
Zatiketa partziala	Onuradunak	Zatikatutakoa	Ez dago
Zatiketa finantzarioa	Onuraduna	Zatikatutakoa	Saltzen den partizipazioarena
Aktibo nahiz pasibo osoaren lagapena	Aktibo eta pasiboak jasotzen dituena	Aktibo eta pasiboak saltzen dituena	Ez dago
Jarduera adarren ekarpena	Jarduera adarra jasotzen duena	Ekarpena egiten duena	Ez dago
Ez diruzko ekarpen berezia	Ekarpena jasotzen duena	Ekarpena egiten duena	Akzio/partizipazioen kasuan bakarrik
Balore trukea	Entitatearen kontrola hartzen duena	Partizipazioak saltzen dituena	Kontrola hartzen den entitatearena
Europar sozietate helbidearen aldaketa	Sozietatea	Ez dago	Ez dago

Entitate eskuratzailea: sozietateen gaineko zergaren erregelamendua onartzen duen ekainaren 16eko 17/2015 Foru Dekretuak 41. artikuluan ezarritakoaren arabera komunikazioa aurkeztera behartuta dagoen entitatearen datuak adierazi behar dira.

Gainerako entitate eskuratzaileak: eragiketan esku hartu duten gainerako entitate eskuratzaileak adierazi behar dira atal honetan.

Eragiketa mota: hurrengo zerrendatik aukeratu behar da zer eragiketa egin den. Bat bakarrik aukeratu:

1. Iresnpen bidezko bat-egitea
2. Entitate berria eratzeko bat-egitea
3. Bat-egite inpropioa
4. Erabateko zatiketa
5. Zatiketa partziala
6. Aktibo nahiz pasibo osoaren lagapenak
7. Jarduera adarren ekarpena
8. Ez diruzko ekarpen berezia
9. Balore trukea
10. Zatiketa finantzarioa
12. Europar sozietate baten edo europar sozietate kooperatibo baten sozietate helbidearen  aldaketa

Eskritura publikoan hainbat eragiketa jasotzen badira,  komunikazio bat aurkeztu behar da eragiketa bakoitzeko, nahiz eta entitate eskuratzailea bera izan.

Eskritura publikoa: eragiketa dokumentatzen duen eskritura publikoaren datuak adierazi behar dira. Orobat, adierazi behar da zein egunetatik aurrera dituen eragiketak kontabilitate-ondorioak

Entitate eskualdatzaileak: eragiketan parte hartu duten entitate eskualdatzaileak zerrendatu behar dira.

Eskuratutako entitateak: eskuratutako entitateren bat ageri bada eragiketan, aipatu egingo da.

Eragiketaren deskribapena: xehetasunez deskribatu behar da egindako eragiketa, eskritura publikoan, proiektuan eta merkataritza-araudiaren arabera nahitaezkoak diren bestelako agirietan jasotakoaren arabera.

Arrazoi ekonomiko balioduna: hautatu behar da zer arrazoi ekonomiko baliodun izan den eragiketa egiteko:

1. Kudeaketa sinplifikatzea kostu administratiboak murrizteko.
2. Kaudimena eta zorpetze-ahalmena handitzea finantza-egitura indartzeko.
3. Egindako jarduerak arrazionalizatzea.
4. Ahalmen handiagoa izatea kreditu-entitateekin finantzaketa-baldintza hobeak negoziatzeko (interes tasa txikiagoak...)
5. Entitateak beste entitate batean dituen eskubide politiko eta ekonomikoak batzea.
6. Merkatuan lehiakorragoa izatea.
7. Bat egiten duten enpresetako baliabide material eta pertsonalen erabilera optimizatzea.
8. Sozietatearen ondare higiezina arrisku enpresarialetik babestea.
9. Beste sozietate batean inbertitzeko erabakiak independizatzea.
10. Jarduerak berregituratu eta arrazionalizatzea negozioan eraginkortasun handiagoa lortzeko.
11. Negozio bakoitza bereizita kudeatzea.
12. Jardueren espezializazio maila handitzea, teknika eta metodologia desberdinak erabiliz, salmenta politika komertzialak aplikatuz eta prezio diferenteak ezarriz.
13. Jarduera mota bakoitzerako behar den finantzazioa errazago lortzea.
14. Beste batzuk

Erantsitako edo erantsi beharreko agiriak: markatu behar da zer modu aukeratu den nahitaezkoa den dokumentazioa aurkezteko, ekainaren 16eko 17/2015 Foru Dekretuak, Sozietateen gaineko Zergaren Erregelamendua onartzen duenak, 41. artikuluan xedatutakoaren arabera.

• Bat-egiteak, zatiketak eta aktibo zein pasibo osoaren lagapenak
• Diruzkoa ez den ekarpena
• Balore trukeak
• Kenkariak