Subjektuak eta baldintzak

Egoitza lurralde espainiarrean ez duen entitate batek lortutako errenta positiboa zergadunei egotziko zaie baldin eta errenta hori aurrerago zehaztuko direnen artean badago eta, gainera, honako baldintzak betetzen badira:

a) Espainian egoitzarik ez duen entitatearen kapitalean, fondo propioetan, emaitzetan edo boto eskubideetan %50eko partaidetza edo handiagoa edukitzea haren ekitaldi soziala ixteko egunean, dela beraiek bakarrik, dela Sozietateen gaineko Zergaren araudiaren arabera lotutako entitateekin batera, dela zuzeneko nahiz zeharkako ahaidetasun harreman batengatik lotuta dauden beste zergadun batzuekin batera, ezkontidea edo izatezko bikote laguna barruan direla maiatzaren 7ko 2/2003 Legearen arabera eratutako izatezko bikotea bada, bigarren mailaraino, hau barne. Harreman hori izan daiteke odolkidetasunezkoa, ezkontza bidezkoa edo maiatzaren 7ko 2/2003 Legearen arabera eratutako izatezko bikoteak ekar lezakeena.

Egoitza Espainian duten pertsona edo entitate lotuentzat zehazten den zeharkako partaidetzaren zenbatekoa kontuan izanik neurtuko da elkarri lotutako entitate ez egoiliarren partaidetza.

Sartu beharreko errenta positiboaren zenbatekoa emaitzetan duten partaidetzaren arabera edo, horren ezean, entitatearen kapital, berezko fondo, edo boto eskubidean duten partaidetzaren arabera zehaztuko da.

b) Sozietateen gaineko Zergaren izaera berbera edo antzekoa duen kargagatik Espainian egoiliarra ez den entitateak ordaindu duen zenbatekoa, segidan zehaztuko diren errenta motetakoren bati egotzitakoa, aipatu zergaren arauei jarraiki egokituko zitzaionaren %75 baino txikiagoa izatea.

c) Bere egoitza Europako Batasunetik kanpoko herrialdeetan egotea, erregelamenduz paradisu fiskaltzat kalifikatutako lurralde batean kokatuta daudenean izan ezik.

Zer eta noiz egozten dira etekinak?

Errenta positiboa egotziko da ondoko iturri hauek direla medio lortu bada:

a) Ondasun higiezin landatar edo hiritarren edo horien gaineko ondasun eskubideen titularitatea, baldin eta enpresa jarduera bati atxikita ez badaude edo, Merkataritza Kodeko 42. artikuluari jarraituz, entitate titularraren sozietate talde berekoak diren entitate ez egoiliarrei erabilerarako lagata ez badaude.

b) Edozein motatako entitateen fondo propioetan parte hartzea eta kapital propioak beste batzuei lagatzea, bai eta Pertsona Fisikoen Errentaren gaineko Zergari buruzko Foru Arauak 34. eta 35. artikuluetan aipatutako gainerako etekin iturriak ere.

Errenta positiboa ez da letra honetan sartuko haren iturria honako finantza aktibo hauek direnean:

• Jarduera enpresarialak egitean sortutako lege eta erregelamenduzko obligazioak betetzeko edukitakoak.

• Jarduera enpresarialen ondorioz finkatutako kontratuzko harremanetatik sortutako kreditu eskubideak ekartzen dituztenak.

• Baloreen merkatu ofizialetan bitartekaritza jarduerak gauzatzearen ondorioz edukitako aktibo finantzarioak.

• Kreditu entitateek eta aseguru etxeek jarduera enpresarialen ondorioz dituzten aktibo finantzarioak, hurrengo c) letran finkatutakoa eragotzi gabe.

Norbere kapitalak hirugarren batzuei lagatzetik ondorioztatutako errenta positiboa ondorengo c) letran aipatutako kreditu eta finantza jarduerak gauzatzetik datorrela ulertuko da, lagatzailea eta lagapen hartzailea, Merkataritza Kodeko 42. artikuluaren arabera, sozietate talde bateko kide direnean eta lagapen hartzailearen dirusarreren %85, gutxienez, jarduera enpresarialak gauzatzetik datorrenean.

c) Kreditu, finantza, aseguru eta zerbitzuak (esportazio jarduerekin zuzenean lotutakoak izan ezik) emateko jarduerak, zuzenean edo zeharka, egoitza lurralde espainiarrean duten eta Sozietateen gaineko Zergaren araudiaren zentzuan elkarrekin lotuta dauden pertsona edo entitateekin, aipatu egoiliarren gastu kenkaridunak zehazten dituzten heinean.

Errenta positiboa ez da kontuan hartuko egoitza lurralde espainiarrean ez duen entitateak egindako kreditu, finantza, aseguru eta zerbitzuak (esportazio jarduerekin zuzenean lotutakoak izan ezik) emateko jardueretatik eratorritako dirusarreren %50 baino gehiago Sozietateen gaineko Zergaren araudiaren zentzuan elkarrekin lotu gabeko pertsona edo entitateekin gauzatutako eragiketetatik datorrenean.

d) Aurreko a) eta b) letretan aipatu diren ondasun eta eskubideen eskualdaketak, ondare irabazi eta galerak sortzen dituztenak.

Halere, erregimen honen araudiak honako salbuespenak ezartzen ditu aurreko a), b) eta d) letretan jasotako errentei dagokienez:

1. Aipatu diren errentak lortu dituen entitate ez egoiliarrak zuzenean edo zeharka %5etik gorako partaidetza duen entitateetatik datozenean, ez dira kontuan hartuko bi baldintza hauek betetzen badira:

• Entitate ez egoiliarrak partaidetzak zuzendu eta kudeatzea, bitarteko materialak eta giza baliabideak antolatuz.
• Errenten sorburu diren entitateen diru-sarreretatik, gutxienez %85 jarduera enpresarialetatik etortzea.

Ondorio horietarako, a), b) eta d) letretan jasotako errentak jarduera enpresarialetatik datozela joko da baldin eta jatorria aurreko b´) letrako baldintza betetzen duten entitateetan badago eta sozietate ez egoiliarrak zuzenean edo zeharka entitate haietan duen partaidetza %5etik gorakoa bada.

2. Era berean, aipaturiko errentak egotzi gabe geratuko dira beren zenbatekoen batura errenta osoaren %15etik beherakoa denean edo entitate ez egoiliarraren diru-sarrera osoen %4 baino txikiagoa denean.

Aurreko paragrafoan ezarritako mugek egoitza espainiar lurraldean ez duten eta Merkataritza Kodeko 42. artikuluaren zentzuan sozietate talde bateko kide diren entitateek lortutako errenta edo diru-sarrerak kontuan hartu ahal izango dituzte.

Inola ere ez da egotziko entitate ez egoiliarraren errenta osoa baino handiagoa den kopurua.

Zergadunaren oinarri ezargarrian ez da egotziko sozietateak ordaindutako Sozietateen gaineko Zergaren berdina edo antzekoa den zergarik, sartu beharreko errentaren zatian.

Oinarri ezargarrian egotzi beharreko errenta positiboa Sozietateen gaineko Zergan oinarri ezargarria zehazteko finkatutako printzipio eta oinarrien arabera kalkulatuko da. Lurralde espainiarrean egoiliarra ez den entitatearen ekitaldi soziala ixtean indarrean dagoen kanbio tasa erabiliko da.

Errenta positibo bati behin bakarrik egin ahal izango zaio egozpena, nola eta zein entitatetan gertatzen den kontuan hartu gabe.

Entitate partizipatuaren egoitza erregelamenduz paradisu fiskal moduan kalifikatutako herri edo lurraldeetan dagoenean, honako hau ulertuko da:

a) Sozietateen gaineko Zergaren antzeko edo pareko karga dela-eta lurralde espainiarrean egoiliarra ez den entitateak ordaindutako zenbatekoa, aipatu errenta motetako bati egotzia, Sozietate Zergaren arauak aplikatuz gero ordainduko zuenaren %75 baino txikiagoa dela

b) Entitate partizipatuak lortutako errenta gorago aipatutako errenta iturrietatik datorrela.

c) Entitate partizipatuak lortutako errenta partaidetzaren eskurapen balioaren %15 dela.

Aurreko letretan jasotako presuntzioek kontrako froga onartuko dute. Dena den, presuntzio horiek ez dira aplikatuko entitate partizipatuak errenta sartzera behartutako beste entitate batekin edo batzuekin bere kontuak bateratzen dituenean, Merkataritza Kodeko 42. artikuluan aurreikusitakoaren arabera.

Noiz egiten da egozpena?

Entitate ez egoiliarretik datorren errenta positiboaren egozpena sozietate horrek ekitaldi soziala amaitu duen egunari dagokion zergaldian egingo da. Ekitaldi soziala ez da inoiz hamabi hilabetetik gorakoa izango, non eta bazkideak zera aukeratzen ez duen: errenta ekitaldi sozialeko kontuen onarpen egunari dagokion zergaldian sartzea, baldin eta ez badira sei hilabete baino gehiago iragan ekitaldi hori amaitu denetik.

Aukera hori ondorioa izan behar duen Errentaren gaineko Zergaren lehen aitorpenean adieraziko da, eta hiru urtez eutsi beharko dio.

Egoiliarren Pertsona Fisikoen Errentaren gaineko Zergaren kuotaren kenkaria

Dibidenduak edo mozkin partaidetzak banatzeagatik atzerrian ordaindutako zerga edo karga kendu ahal izango da kuotatik, oinarri ezargarrian sartutako errenta positiboari dagokion zatian beti ere. Atzerriko zerga ezarpen bikoitza saihesteko hitzarmen bat aplikatuz edo dagokion herrialde edo lurraldearen barne legeriari jarraituz ordain daiteke.

Kenkari hau egingo da nahiz eta errenta positiboa oinarrian sartu den ekitaldia eta zergei dagozkien ekitaldiak berdinak ez izan.

Kenkaria ez da handiagoa izango oinarri ezargarrian egotzitako errenta positiboagatik Espainian ordaindu beharko zen kuota osoa baino.

Erregelamenduz paradisu fiskaltzat kalifikatuta dauden herrialde edo lurraldeetan ordaintzen diren zergek ez dute inoiz kenkaririk izango.

Pertsona fisiko egoiliarrek partaidetza eskualdatzea

Zuzeneko edo zeharkako partaidetza eskualdatzeagatik lortu den errenta kalkulatzeko, sozietate gardenetako partaidetzen eskualdaketaren arau orokorrak erabiliko dira, oinarri ezargarrian egotzitako errenta positiboari dagokionez. Sozietateen mozkinak oinarri ezargarrian egotzitako errenta positiboari dagozkionak izango dira.

Nazioarteko gardentasun fiskaleko erregimena aplikatzetik datozen obligazio formalak

Erregimen hau aplikagarri duten zergadunek honako datu hauek adieraziko dituzte, zerga honen aitorpenarekin batera, lurralde espainiarrean egoiliarra ez den entitateari buruz:

a) Izena edo sozietatearen izena, eta helbidea.

b) Administratzaileen zerrenda.

c) Balantzea eta galera-irabazien kontua.

d) Egotzi behar diren errenta positiboen zenbatekoa.

e) Egotzi behar den errenta positiboa dela-eta ordaindu diren zergen frogagiriak

Erregimen honetarako aurreikusitakoaz gain, Espainiako barne ordenamenduan sartu diren nazioarteko itun eta hitzarmenak eta Pertsona Fisikoen Errentaren gaineko Zergaren Foru Arauak 6. artikuluan xedatutakoa hartuko dira kontuan.