Bortzirietara salto egingo dugu oraingoan bertako dantza-luzea Dantzan Ikasira ekartzeko. Arantzatik Itziar Mitxelena, Leire Mitxelena, Aitziber Lizardi eta Aintzane Pikabea etorriko zaizkigu txikitatik herriko plazan dantzatu eta txistuz jo duten soka-dantza hau erakustera. Abuztuko Ama-Birjinaren egunean dantzatzen dute arantzarrek dantza luzea oso-osorik. Espainiako Gerrate Zibilarekin dantzatzeari utzi zitzaion eta urtetan galduta egon ostean, 70-80ko hamarkadetan kanpoko zenbait taldek, besteak beste Donostiako Argia, Lasarte-Oriako Erketz, Iruñeko Ortzadar eta Santurtziko Mendi Alde,  Arantzako dantza-luzean interesa azaldu eta herriko nagusienei ikasita dantza-luzea berregin zuten. Kanpotar haiek egindako ahalegin eta interesen arrastotik, zenbait herritarrek kontzientzia hartu eta herrian bertan martxan jartzea erabaki eta lortu zuten. Ohitura sendo finkatu da egundaino eta dagoeneko belaunaldi desberdinek elkarrekin dantzatzen dute dantza-luzea.

Astelehena, 2018(e)ko apirila(r)en 02-(e)an 15:07etan